شير بخشو: هي ڪلهوڙا حڪمرانن جو خاص فوجي آفيسر هو. جڏهن ڪانجيءَ جي واليءَ سرڪشي ڪري هڪ باغي تاجن منڌري کي پناهه ڏني، تڏهن ميان نور محمد، ڪانجيءَ جي قلعي کي فتح ڪرڻ جو پڪو ارادو ڪيو. ميان نور محمد پنهنجي خاص فوجي لشڪر سان گڏ شير بخشو کي تيار ٿيڻ جو حڪم ڏنو. ميان نور محمد لشڪر گڏ ڪري قلعي تي حملو ڪري ڏنو. شير بخشو وڏي دليريءَ سان وڙهيو ۽ سندس ڏاهپ جي ڪري ئي ڪانجيءَ جو واليءَ گرفتار ٿيو. تاجن منڌرو ڀڄي وڃڻ ۾ ڪامياب ٿي ويو ۽ ويتر سرڪشي ڪرڻ لڳو. آَخر ميان نور محمد، شير بخشو ۽ شاهه بهاري کي موڪلي تاجن کي وڏي مشڪل سان گرفتار ڪرايو ۽ کيس قتل ڪرڻ جو حڪم ڏنائين. ‘نامه نغز’ مان معلوم ٿئي ٿو ته ڪانجيءَ جو قلعو محرم 1159هه/ جنوري 1746ع ۾ فتح ٿيو.